Alvíssmál

Alvíss qvaþ:

1 «Becki breiþa,
nv scal brvþr m mer
heim i sinni snvaz;
hrataþ vm mégi
mvn hveriom þiccia,
heima scalat hvíld nema.»

Þórr qvaþ:

2 «Hvat er þat fira?
hví ertv sva fꜹlr vm nasar?
vartv i nótt m ná?
þvrsa líci
þicci mer a þer vera;
ertattv til brvþar borinn

Alvíss qvaþ:

3 «Alvíss ec heiti,
by ec fyr iorþ neþan,
a ec vndir steini staþ;
vagna vers
ec em a vit kominn;
bregði engi fꜹsto heiti fira!»

Þórr qvaþ:

4 «Ec mvn bregda,
þviat ec brvþar a
flest vm ráþ sem faþir;
varca ec heima,
þa er þer heitiþ var,
at sa einn er † giꜹfer m godom

Alvíss qvaþ:

5 «Hvat er þat recca,
er i raþom telz
flioþs ens fagrgloa?
fiarrafleina
þic mvno fair kvnna;
hverr hefir þic bꜹgom borit?»

Þórr qvaþ:

6 «Vingþórr ec hęiti,
ec hefi viþa rataþ,
sonr em ec Siþgrana;
at osatt minni scalattv
þat iþ vnga man hafa
oc þat giaforþ geta.»

Alvíss qvaþ:

7 «Sattir þinar
ęr ec vil snemma hafa
oc þat giaforþ geta;
eiga vilia heldr
enn án vera
þat iþ miallhvita man.»

Þórr qvaþ:

8 «Meyiar astom
mvna þer verþa,
visi gestr! of variþ,
ef þv or heimi kant
hveriom at segia
alt þat er ec vil vita.

9 Segðv mer þat, Alvíss!
oll of rꜹc fira
voromc, dvergr! at vitir:
hve sv iorþ heitir,
er liggr fyr alda sonom,
heimi hveriom i?»

Alvíss qvaþ:

10 «Iorþ heitir m monnom,
en m asom fold,
calla vega vanir,
igrǫn iotnar,
alfar groandi,
kalla ꜹ́r vpregin.»

Þórr qvaþ:

11 «Segdv mer þat, Alvíss!
oll of rꜹc fira,
voromc, dvergr! at vitir:
hve sa himinn heitir,
† erakendi,
heimi hveriom i?»

Alvíss qvaþ:

12 «Himinn heitir m monnom,
en hlyrnir m godom,
kalla vindofni vanir,
vppheim iotnar,
alfar fagra ręfr,
dvergar drivpan sal.»

Þórr qvaþ:

13 «Segðv mer þat, Alvíss!
oll of rꜹc fira
voromc, dvergr! at vitir:
hverso máni heitir,
sa er menn sia,
heimi hveriom i?»

Alvíss qvaþ:

14 «Mani heitir m monnom,
en mylinn m godom,
kalla hverfanda hvel helio i,
scyndi iotnar,
en scin dvergar,
kalla alfar artala.»

Þórr qvaþ:

15 «Segðv mer þat, Alvíss!
oll of rꜹc fira
voromc, dvergr! at vitir:
hve sv sol heitir,
er sia alda synir,
heimi hveriom i?»

Alvíss qvaþ:

16 «Sol heitir m monnom,
enn svnna m goþom,
kalla dvergar Dvalins lęica,
eyglo iotnar,
alfar fagra hvel,
alscír asa synir

Þórr qvaþ:

17 «Segðv mer þat, Alvíss!
oll of rꜹc fira
voromc, dvergr! at vitir:
hve þꜹ scy heita,
er scvrom blandaz,
heimi hveriom i?

Alvíss qvaþ:

18 «Scy heitir m monnom,
enn scv́rvan meþ goðom,
kalla vindflot vanir,
vrván iotnar,
alfar veþrmegin,
kalla i helio hialm hvliz.»

Þórr qvaþ:

19 «Segðv mer þat, Alvíss!
oll of rꜹc fira
voromc, dvergr! at vitir:
hve sa vindr heitir,
er viðast ferr,
heimi hveriom i?»

Alvíss qvaþ:

20 «Vindr heitir m monnom,
enn vávoþr m goðom,
kalla gneggioþ ginnregin,
ǫpi iꜹtnar,
alfar dynfara,
kalla i helio hviþvþ.»

Þórr qvaþ:

21 «Segðv mer þat, Alvíss!
oll of rꜹc fira
voromc, dvergr! at vitir:
hve þat logn heitir,
er liggia scal,
heimi hveriom i?»

Alvíss qvaþ:

22 «Logn heitir m monnom,
enn lǫgi m goðom,
kalla vindslot vanir,
ofhlý iǫtnar,
alfar dagsęva,
kalla dvergar dags vero.»

Þórr qvaþ:

23 «Segðv mer þat, Alvíss!
oll of rꜹc fira
voromc, dvergr! at vitir:
hve sa marr heitir,
er menn roa,
heimi hveriom i?»

Alvíss qvaþ:

24 «Sęr heitir m monnom,
en silęgia m goþom,
kalla vág vanir,
álheim iotnar,
alfar lagastaf,
kalla dvergar divpan mar.»

Þórr qvaþ:

25 «Segðv mer þat, Alvíss!
oll of rꜹc fira
voromc, dvergr! at vitir:
hve sa eldr heitir,
er brenn fyr alda sonom,
heimi hveriom i?»

Alvíss qvaþ:

26 «Eldr heitir m monnom,
enn m asom fvni,
kalla vag vanir,
frekan iotnar,
en forbrenni dvergar,
kalla i helio hrꜹþvþ.»

Þórr qvaþ:

27 «Segðv mer þat, Alvíss!
oll of rꜹc fira
voromc, dvergr! at vitir:
hve sa viþr heitir,
er vex fyr alda sonom,
heimi hveriom i?»

Alvíss qvaþ:

28 «Viþr heitir m monnom,
enn vallar fax m goðom,
kalla hliþþang halir,
elldi iotnar,
alfar fagrlima,
kalla vond vanir

Þórr qvaþ:

29 «Segðv mer þat, Alvíss!
oll of rꜹc fira
voromc, dvergr! at vitir:
hve sv nótt heitir,
en Nꜹrvi kenda,
heimi hveriom i?»

Alvíss qvaþ:

30 «Nott heitir m monnom,
en niól m goðom,
kalla grimo ginnregin,
oliós iotnar,
alfar svefngaman,
kalla dvergar drꜹmniorvn.»

Þórr qvaþ:

31 «Segðv mer þat, Alvíss!
oll of rꜹc fira
voromc, dvergr! at vitir:
hve þat sáþ heitir,
er sá alda synir,
heimi hveriom i?»

Alvíss qvaþ:

32 «Bygg heitir m monnom,
enn barr m goðom,
kalla vaxt vanir,
ęti iꜹtnar,
alfar lagastaf,
kalla i helio hnipinn

Þórr qvaþ:

33 «Segðv mer þat, Alvíss!
oll of rꜹc fira
voromc, dvergr! at vitir:
hve þat ꜹl heitir,
er drecca alda synir,
heimi hveriom i?»

Alvíss qvaþ:

34 «Ǫl heitir m monnom,
enn m asom biórr,
kalla veig vanir,
hreina lꜹg iꜹtnar,
enn i helio mioþ,
kalla svmbl Svttvngs synir.»

Þórr qvaþ:

35 «I eino briosti
ec sác aldregi
fleiri forna stafi;
miclom talom
ec qveð teldan þic:
vppi ertv, dvergr! vm dagaþr,
nv scinn sól i sali.»

Источник: Sophus Bugge: Sæmundar Edda (1867).

Текст с сайта Old Norse etexts

По всем вопросам пишите в раздел форума Valhalla: Эпоха викингов