Helreið Brynhildar

Eptir dꜹþa Brynhildar váro gor bál tvꜹ, annat Sigvrþi, oc brann þat fyrr, enn Brynhildr var a oþro brend, oc var hon i reiþ þeirri, er gvðvefiom var tioldoþ. Sva er sagt, at Brynhildr ok m reiðinni a helveg oc for vm tv́n, þar er gygr noccor bio. Gygrin qvaþ:

1 «Scaltv i gognom
ganga eigi
grioti stvdda
garða mina;
betr semþi þer
borða at rekia ę,
heldr enn vitia
vers annarrar.

2 Hvat scaltv vitia
af Vallandi,
hvarfúst hꜹf!
hvsa minna?
þv hefir, vár gvllz!
ef þic uita lystir,
mild af hondom
mannz bloþ þuegit.»

Brynhildr qvaþ:

3 «Bregþv eigi mer,
brvþr or steini!
þott ec uęrac
i uikingo;
ec mvn occor
ǫþri þiccia,
hvars menn ęþli
occart kvnna.»

Gygrin qvaþ:

4 «Þv vart, Brynhildr
Bvdla dottir!
heilli versto
i heim borin;
þv hefir Givca
vm glatat bornom
oc bvi þeirra
brvgðit goðo.»

Brynhildr qvaþ:

5 «Ec mvn segia þer
svinn or reiþo
vitlꜹssi mioc,
ef þic vita lystir,
hve gorðo mic
Givca arfar
astalꜹsa
oc eiþrofa.

6 Let hami vára
hvgfvllr konvngr
átta systra
vndir eic borit;
var ec vetra tolf,
ef þic vita lystir,
er ec vngom gram
eiþa seldac.

7 Heto mic allir
i Hlymdꜹlom
Hildi vndir hialmi
hverr er kvnni.

8 Þa let ec gamlan
a Godþioþo
Hialmgvnnar nęst
heliar ganga;
gaf ec vngom sigr
Avþo broþor,
þar varþ mer Oþinn
ofreiþr vm þat.

9 Lꜹc hann mic scioldom
i Scatalvndi
rꜹþom oc hvitom,
randir snvrto;
þann bað hann slita
svefni minom,
er hvergi landz
hrǫþaz kynni.

10 Let hann vm sal minn
svnnanverþan
havan brenna
her allz viþar;
þar baþ hann einn þegn
yfir at riþa,
þannz mer fǫrði gvll,
þatz vnd Fafni la.

11 Reiþ goþr Grana
gvllmiþlandi,
þars fostri minn
fletiom styrþi;
einn þotti hann þar
ollom betri
vikingr Dana
í verþvngo.

12 Svafo viþ oc vnþom
i sęing einni,
sem hann minn broþir
vm borinn vęri;
hvartki knatti
hond yfir annat
átta nottom
occart leggia.

13 Þvi brá mer Gvdrvn
Giv́ca dottir,
at ec Sigvrþi
svefac a armi;
þar varþ ec þess vís,
er ec vildigac,
at þꜹ velto mic
i verfangi.

14 Mvno viþ ofstríþ
allz til lengi
konor oc karlar
qvicqvir fǫdaz;
við scolom ocrom
aldri slíta
Sigvrþr saman.
Seycstv, gygiarkyn!»

Источник: Sophus Bugge: Sæmundar Edda (1867).

Текст с сайта Old Norse etexts

По всем вопросам пишите в раздел форума Valhalla: Эпоха викингов