Hyndluljóð

Freyia qvaþ:

1 «Vaki mær meyia,
vaki min vina,
Hyndla systir!
er i helli byr;
nu er rauckr rauckra,
rida vit skulum
til Valhallar
ok til vess heilags.

2 Bidium Heriafaudur
i hugum sitia;
hann gelldr ok gefr
gull verdungu;
gaf hann Hermodi
hialm ok bryniu,
enn Sigmundi
suerd at þiggia.

3 Gefr hann sigr sonum,
en summum aura,
mælsku morgum
ok mannvit firum;
byri gefr hann braugnum,
enn brag skꜳldum,
gefr hann mannsemi
morgum recki.

4 Þor mun hon blota,
þess mun hon bidia,
at hann æ vid þik
einart laati;
þo er honum otijtt
vid iotuns brudir.

5 Nu taktu vlf þinn
einn af stalli,
lꜳt hann renna
med runa minum
Hyndla qvaþ:
«Seinn er gaulltr þinn
godveg troda,
vilkat ek mar minn
mætann hleda.

6 Fla ertu, Freyia!
er þu freistar min,
visar þu augum
ꜳ oss þannig,
er þu hefir ver þinn
i valsinne,
Ottar unga,
Innsteins bur.»

Freyia qvaþ:

7 «Dulin ertu, Hyndla!
draums ætlig þer,
er þu kuedr ver minn
i valsinni,
þar er gaulltr gloar
gullinbusti
Hilldisuine,
er mer hagir giordu
duergar tueir,
Dꜳinn ok Nabbi.

8 Sennum vit or sodlum,
sitia vit skulum
ok vm iofra
ættir dæma,
gumna þeirra
er fra godum kuomu.

9 Þeir hafa vediat
Vala mꜳlmi
Ottar ungi
ok Angantyr;
skyllt er at veita,
sua at skati enn vngi
faudurleifd hafui
eftir frændr sina.

10 Haurg hann mer gerdi
hladinn steinum
— nu er griot þat
at gleri vordit —,
raud hann i nyiu
nauta blodi,
æ trvdi Ottar
ꜳ asyniur.

11 Nu lꜳttu forna
nidia talda
ok vpp bornar
ættir manna:
huat er Skiolldunga,
huat er Skilfinga,
huat er Audlinga,
huat er Ylfinga,
huat er haulldborit,
huat er hersborit,
mest manna val
vnd Midgardi?»

Hyndla qvaþ:

12 «Þu ert, Ottar!
borinn Innsteini,
enn Innsteinn var
Aalfui enum gamla;
Aalfr var Vlfui,
Vlfr Sæfara,
enn Sæfari
Suan enum rauda.

13 Modur ꜳtti fadir þinn
menium gaufga,
hygg ek at hon heti
Hledis gydia;
Frodi var fadir þeirrar,
enn † Friaut modir;
aull þotti ætt su
med yfirmonnum.

14 Aali var ꜳdr
auflgazstr manna,
Halfdan fyrri
hæstr Skiolldunga;
fræg voru folkvig
þau er framir gerdu,
huarfla þottu hans verk
med himins skautum.

15 Efldiz hann vid Eymund
æzstann manna,
enn hann vǫ Sigtrygg
med suolum eggium;
eiga geck Aalmueig
æzsta quinna,
olu þau ok ꜳttu
ꜳtian sonu.

16 Þadan eru Skiolldungar,
þadan eru Skilfingar,
þadan Audlingar,
þadan Ynglingar,
þadan haulldborit,
þadan hersborit,
mest manna val
vnd Midgardi;
allt er þat ætt þin,
Ottar heimski!

17 Var Hilldigunn
hennar modir
Suofu barn
ok Sækonungs;
allt er þat ætt þin,
Ottar heimski!
vardar at viti sua,
viltu enn leingra?

18 Dagr ꜳtti Þoru
drengia modur,
oluzst i ætt þar
æzstir kappar:
Fradmarr ok Gyrdr
ok Frekar bꜳdir,
Ámr ok Iosurmar,
Aalfr enn gamli;
vardar at viti sua,
villtu enn leingra?

19 Ketill het vinr þeirra
Klyps arfþegi,
var hann modurfadir
modur þinnar;
þar var Frodi
fyrr enn Kꜳri,
hinn elldri var
Aalfr vm getinn.

20 Nanna var næst þar
Nauckua dottir,
var maugr hennar
mꜳgr þins faudur;
fyrnd er su mægd,
fram tel ek leingra:
kunna ek bꜳda
Brodd ok Haurfi;
allt er þat ætt þin,
Ottar heimski!

21 Isolfr ok Aasolfr
Aulmods synir
ok Skurhilldar
Skeckils dottur,
skaltu til telia
skatna margra;
allt er þat ætt þin,
Ottar heimski!

22 Gunnar bꜳlkr,
Grimr ardskafui,
iarnskiolldr Þorir,
Vlfr ginandi.
      *             *
      *             *

23 [Hervardr, Hiorvardr,
Hrani, Angantyr,]
Bui ok Brami,
Barri ok Reifnir,
Tindr ok Tyrfingr
ok tueir Haddingiar;
allt er þat ætt þin,
Ottar heimski!

24 Austr i Bolm
voru bornir,
Arngrims synir
ok Eyfuru;
braukun berserkia
bauls margskonar
vm laund ok vm laug
sem logi færi;
allt er þat ætt þin,
Ottar heimski!

25 Kunna ek bꜳda
Brodd ok Haurfi,
voru þeir i hird
Hrolfs ens gamla.
Allir bornir
fra Iormunreki
Sigurdar mꜳgi,
— hlyd þu saugu minni! —
folkum grims
þess er Fafni uǫ.

26 Sa var visir
fra Vaulsungi
ok Hiordis
fra Hraudungi,
enn Eylimi
fra Audlingum;
allt er þat ætt þin,
Ottar heimski!

27 Gunnarr ok Haugni
Giuka arfar,
ok id sama Gudrun
systir þeirra:
eigi var Guthormr
Giuka ættar,
þo var hann brodir
beggia þeirra;
allt er þat ætt þin,
Ottar heimski!

28 Haralldr hillditaunn
borinn Hræreki
slaunguanbauga,
sonr var hann Audar,
Audr diupudga
Ifuars dottir,
enn Radbardr var
Randués fadir;
þeir voru gumnar
godum signadir;
allt er þat ætt þin,
Ottar heimski!

29 Voru ellifu
æsir taldir,
Balldr er hne
vid banaþufu;
þess letz Vali
verdr at hefna,
sins brodur
slo hann handbana;
allt er þat ætt þin,
Ottar heimski!

30 Var Balldrs fadir
Burs arfþegi,
Freyr atti Gerdi,
hon var Gymis dottir,
iotna ættar,
ok Aurbodu;
þo var Þiassi
þeirra frændi
skautgiarn iotun,
hans var Skadi dottir.

31 Mart segium þer
ok munum fleira,
vǫrumz at viti sua,
villtu enn leingra?

32 Haki var Huædnu
hoti bezstr sona,
enn Huędnu var
Hiorvardr fadir;
Heidr ok Hrossþiofr
Hrimnis kindar.

33 Eru vaulur allar
fra Vidolfui,
vitkar allir
fra Vilmeidi,
seidberendr
fra Suarthofda,
iotnar allir
fra Ymi komnir.

34 Mart segium þer
ok munum fleira,
vǫrumzst at viti sua,
villtu enn leingra?

35 Vard einn borin
i ꜳrdaga
rammaukin miok
raugna kindar;
niu bꜳru þann
naddgaufgann mann
iotna meyiar
vid iardar þraum.

36 Mart segium þer
ok munum fleira,
vǫrumz at viti sua,
villtu enn leingra?

37 Hann Gialp vm bar,
hann Greip vm bar,
bar hann Eistla
ok Eyrgiafa,
hann bar Vlfrun
ok Angeyia,
Imdr ok Atla
ok Iarnsaxa.

38 Sa var aukinn
iardar megni,
sualkaulldum
ok sonardreyra.

39 Mart segium þer
ok munum fleira,
vǫrumz at viti sua,
villtu enn leingra?

40 Ol vlf Loki
vid Angrbodu,
enn Sleipni gat
vid Suadilfara;
eitt þotti skars
allra feiknazst,
þat var brodur fra
Byleistz komit.

41 Loki af hiarta
lindi brendu,
fann hann hꜳlfsuidinn
hugstein konu;
vard Loptr kuidugr
af konu illri;
þadan er ꜳ folldu
flagd huert komit.

42 Haf gengr hridum
vid himin sialfann,
lidr lond yfir,
enn loft bilar;
þadan koma sniofar
ok snarir vindar,
þa er i rꜳdi,
at regn vm þrioti.

43 Vard einn borinn
aullum meiri,
sa var aukinn
iardar megni;
þann kueda stilli
storaudgazstann,
sif sifiadann
siotum giorfaullum.

44 Þa kemr annar
enn mꜳtkari,
þo þori ek eigi
þann at nefna;
fꜳir sia nu
fram vm leingra,
enn Odinn man
vlfui mæta.»

Freyia qvad:

45 «Ber þu minnis aul
minum gesti,
sua hann aull mune
ord at tina
þersar rædu
ꜳ þridia morni,
þa er þeir Angantyr
ættir rekia.»

Hyndla qvad:

46 «Snudu braut hedan!
sofua lystir mik,
fær þu fꜳtt af mer
fridra kosta;
hleypr þu, edlvina!
vti ꜳ nꜳttum,
sem med haufrum
Heidrun fari.

47 Rant at Odi
ey þreyiandi,
skutuzst þer fleiri
vnd fyrirskyrtu;
hleypr þu, edlvina!
vti a nattum,
sem med haufrum
Heidrun fari.»

Freyia qvad:

48 «Ek slæ elldi
of ividiu,
sua at þu eigi kemz
ꜳ braut hedan;
.   .   .   .   .   .
.   .   .   .   .   .
.   .   .   .   .   .
.   .   .   .   .   .»

Hyndla qvad:

49 Hyr se ek brenna
enn haudr loga,
verda flestir
fiorlausn þola;
ber þu Ottari
bior at hendi
eitri blandinn miok
illu heilli.»

Freyia qvad:

50 «Ordheill þin
skal engu rꜳda,
þottu, brudr iotuns!
baulfui heitir;
hann skal drecka
dyrar veigar,
bid ek Ottari
aull god duga.»

Источник: Sophus Bugge: Sæmundar Edda (1867).

Текст с сайта Old Norse etexts

По всем вопросам пишите в раздел форума Valhalla: Эпоха викингов