Lokasenna

Fra Egi oc godom

Egir, er ꜹdro nafni het Gýmir, hann hafði bvit asom ꜹl, þa er hann hafði fengit ketil inn micla, sem nv er sagt. Til þeirrar veizlo com Oþinn oc Frigg kona hans. Þorr com eigi, þviat hann var i ꜹstrvegi. Sif var þar kona Þórs. Bragi oc Iþvnn kona hans. Tyr var þar, hann var einhendr: Fenrisvlfr sleit hꜹnd af hanom, þa er hann var bvndinn. Þar var Niorþr oc kona hans Scaði. Freyr oc Freýia. Viðarr son Oþins. Loki var þar. Oc þionvstomenn Freys Beyggvir oc Beyla. Mart var þar asa oc alfa.

Ęgir atti tva þionvstomenn: Fimafengr oc Elder. Þar var lysigvll haft fyr eldz liós; sialft barsc þar ꜹl; þar var griþastadr micill. Menn lofoðo mioc, hverso goðir þionvstomenn Egis voro. Loki matti eigi heyra þat oc drap hann Fimafeng. Þa scóco ęsir scioldo sina oc ǫpþo at Loca oc elto hann brꜹt til scogar, enn þeir foro at drecca. Loci hvarf aptr oc hitti vti Eldi; Loci qvaddi hann:

1 Segðv þat, Eldir!
sva at þv einvgi
feti gangir framarr:
hvat her inni hafa
at ꜹlmálom
sigtifa synir.»

Eldir qvaþ:

2 «Of vapn sín dǫma
oc vm vigrisni sina
sigtifa synir;
asa oc alfa,
er her inni ero,
mangi er þer i orði vinr.»

Loci qvaþ:

3 «Inn scal ganga
Ęgiss hallir i
a þat svmbl at siá;
ioll oc áfo
fǫri ec asa sonom
oc blend ec þeim sva meini mioþ.»

Eldir qvaþ:

4 «Veiztv, ef þv inn gengr
Ęgis hallir í
á þat svmbl at sia,
hropi oc rógi
ef þv eýss a holl regin,
a þer mvno þꜹ þerra þat

Loci qvaþ:

5 «Veiztv þat, Eldir!
ef við einir scolom
sáryrdom sacaz,
ꜹþigr verþa mvn ec
i andsvorom,
ef þv męlir til mart.»

Siþan gecc Loci inn i hꜹllina. Enn er þeir sa, er fyr varo, hverr inn var kominn, þꜹgnoþo þeir allir.

Loci qvaþ:

6 «Þyrstr ec com
þessar hallar til
Loptr vm langan veg,
aso at biþia,
at mer einn gefi
męran drycc miaðar.

7 Hvi þęgit er sva,
þrvngin goð!
at þer męla ne megoð?
sessa oc staþi
velið mer svmbli at,
ęda heitiþ mic heþan

Bragi qvaþ:

8 «Sessa oc staði
velia þer svmbli at
ęsir aldregi;
þviat ęsir vito,
hveim þeir alda scolo
gambansvmbl vm geta.»

Loci qvaþ:

9 «Mantv þat, Oþinn!
er við i ardaga
blendom bloþi saman:
ꜹlvi bergia
leztv eigi mvndo,
nema ocr vęri baþom borit?»

Oþinn qvaþ:

10 «Ristv þa, Viþarr!
oc lat vlfs fꜹþvr
sitia svmbli at,
siþr oss Loci
qveþi lastastꜹfom
Ęgis hꜹllo í.»

Þa stoþ Viþarr vp oc skencti Loca; ennr hann drycci, qvaddi hann asona:

11 «Heilir ęsir,
heilar asynior
oc ꜹll ginnheilog goð!
nema sa einn áss,
er innar sitr,
Bragi, becciom a.»

Bragi qvaþ:

12 «Mar oc męki
gef ec þer mins fiar
oc bǫtir þer sva bꜹgi Bragi:
siþr þv asom
ꜹfvnd vm gialdir;
gremþv eigi goð at þer

Loci qvaþ:

13 «Iós oc armbꜹga
mvndv ę vera
beggia vanr, Bragi!
asa oc alfa,
er her inni ero,
þv ert viþ víg varastr
oc sciarrastr viþ scot.»

Bragi qvaþ:

14 «Veit ec, ef fyr vtan vęrac,
sva sem fyr innan emc,
Ęgis hꜹll vm kominn:
hꜹf þitt bęra ec
i hendi mer;
litt [qveþ] ec þer þat fyr lygi.»

Loci qvaþ:

15 «Sniallr ertv i sessi,
scalatv sva gora,
Bragi beccscrꜹtvþr!
vęga þv gacc,
ef þv reiþr sér!
hyggz vętr hvatr fyrir

Iþvnn qvaþ:

16 «Biþ ec, Bragi!
barna sifiar dvga
oc allra oscmaga,
at þv Loca qveþira
lastastꜹfom
Ęgis hꜹllo í.»

Loci qvaþ:

17 «Þegi þv, Iþvnn!
þic qveþ ec allra qvenna
vergiarnasta vera,
sitztv arma þina
lagdir itrþvegna
vm þinn broþvrbana.»

Iþvnn qvaþ:

18 «Loca ec qveþca
lastastꜹfom
Ęgis hꜹllo í;
Braga ec kyrri
biórreifan;
vilcat ec, at iþ reiðir vegiz.»

Gefion qvaþ:

19 «Hvi iþ ęsir tvęir
scoloþ inni her
saryrþom sacaz?
Loptci þat veit,
at hann leikinn er
oc hann fiorg avll fiá.»

Loci qvaþ:

20 «Þegi þv, Gefion!
þess mvn ec nv geta,
er þic glapþi at geði
sveinn inn hvíti,
er þer sigli gaf
oc þv lagdir lęr yfir

Oþinn qvaþ:

21 «Ǫrr ertv, Loci!
oc ꜹrviti,
er þv fǫr þer Gefion at gremi;
þviat aldar orlꜹg
hygg ec at hon ꜹll vm viti
iafngorla sem ec.»

Loci qvaþ:

22 «Þegi þv, Oþinn!
þv kvnnir aldregi
deila vig m verom;
opt þv gaft þeim,
er þv gefa scyldira,
enom slęvorom sigr.»

Oþinn qvaþ:

23 «Veiztv, ef ec gaf þeim,
er ec gefa ne scylda,
enom slęvorom sigr:
atta vetr vartv
fyr iorþ neþan
kýr mólcandi oc cona,
oc hefir þv þar [born of] borit,
oc hvgða ec þat args aþal.»

Loci qvaþ:

24 «Enn þic síþa koþo
Sámseyio í
oc draptv a vétt sem vꜹlor;
vitca líci
fórtv verþioþ yfir,
oc hvgða ec þat args aþal.»

Frigg qvaþ:

25 «Avrlꜹgom ycrom
scylit aldregi
segia seggiom fra,
hvat iþ ęsir tveir
drygdvt i ardaga;
firriz ę forn rꜹc firar!»

Loci qvaþ:

26 «Þegi þv, Frigg!
þv ert Fiorgyns męr
oc hefir ę vergiorn veriþ,
er þa Vea oc Vilia
leztv þer, Viþris qvęn!
bada i badm vm tekit.»

Frigg qvaþ:

27 «Veiztv, ef ec inni ettac
Egis hꜹllom i
Baldri lican bvr:
vt þv ne qvǫmir
fra asa sonom,
oc vęri þa at þer reiþom vegit.»

Loci qvaþ:

28 «Enn vill þv, Frigg!
at ec fleiri telia
mina meinstafi:
ec þvi ręd,
er þv riþa serat
siþan Baldr at sꜹlom

Freyia qvaþ:

29 «Ǫrr ertv, Loci!
er þv ydra telr
liota leiþstafi;
orlꜹg Frigg
hygg ec at ꜹll viti,
þott hon sialfgi segi.»

Loci qvaþ:

30 «Þegi þv, Freyia!
þic cann ec fvllgerva,
era þer vamma vant:
asa oc alfa,
er her inni ero,
hverr hefir þinn hór veriþ.»

Freyia qvaþ:

31 «Flá er þer tvnga,
hygg ec at þer fremr
myni ogott vm gala;
reiþir ’ro þer ęsir
oc asynior;
hryggr mvntv heim fara.»

Loci qvaþ:

32 «Þegi þv, Freyia!
þv ert fordǫþa
oc meíni blandin mioc,
sitz þic at brǫþr þinom
stóþo bliþ regin,
oc mvndir þv þa, Freyia! frata.»

Niorþr qvaþ:

33 «Þat er válitit,
þótt ser varþer
vers fái hóssa hvars;
hitt er vndr, er áss ragr
er her inn of kominn,
oc hefir sa born of borit.»

Loci qvaþ:

34 «Þegi þv, Niorþr!
þv vart ꜹstr heþan
gisl vm sendr at goðom;
Hymis meyiar hꜹfðo
þic at hlandtrogi
oc þer i mvnn migo.»

Niorþr qvaþ:

35 «Sv eromc licn,
er ec varc langt heþan
gisl vm sendr at goþom:
þa ec mꜹg gat,
þann er mangi fiár,
oc þiccir sa asa iadarr

Loci qvaþ:

36 «Hettv nv, Niorþr!
hafþv a hófi þic,
mvnca ec þvi leyna lengr:
við systor þinni
gaztv slican mꜹg,
oc era þo vóno verr

Tyr qvaþ:

37 «Freyr er beztr
allra ballriþa
asa gordom í;
mey hann ne grętir
ne mannz kono,
oc leysir or hꜹptom hvern.»

Loci qvaþ:

38 «Þegi þv, Tyr!
þv kvnnir aldregi
bera tilt m tveim;
handar ennar hǫgri
mvn ec hinnar geta,
er þer sleít Fenrir fra

Tyr qvaþ:

39 «Handar em ec vanr,
enn þv hroþrs-vitniss,
bꜹl er beggia þrá;
vlfgi hefir oc vel,
er i bondom scal
bíþa ragnarꜹcrs.»

Loci qvaþ:

40 «Þegi þv, Týr!
þat varþ þinni cono,
at hon atti mꜹg v mer;
ꜹln ne penning
hafþir þv þess aldregi
vanréttiss, vesall!»

Freyr qvaþ:

41 «Vlf se ec liggia
arósi fyr,
vnz rivfaz regin;
þvi mvndv nęst,
nema þv nv þegir,
bvndinn, bꜹlvasmiþr

Loci qvaþ:

42 «Gvlli keypta
leztv Gymis dottvr
oc seldir þitt sva sverþ;
enn er Mvspellz synir
ríða Myrcviþ yfir,
veizta þv þa, vesall! hve þv vegr.»

Byggvir qvaþ:

43 «Veiztv, ef ec ø̨þli ęttac
sem Ingvnar-Freyr
oc sva sęlict setr,
mergi smęra mꜹlþa ec
þa męíncráco
oc lemþa alla i liþo.»

Loci qvaþ:

44 «Hvat er þat iþ litla,
er ec þat lꜹggra sec
oc snapvist snapir;
at eyrom Freys
mvnðv ę vera
oc vnd kvernom klaca.»

Beyggvir qvaþ:

45 «Beyggvir ec heíti,
enn mic braþan qveþa
goð ꜹll oc gvmar:
þvi em ec her hroðvgr,
at drecca Hroptz megir
allir ꜹl saman.»

Loci qvaþ:

46 «Þegi þv, Byggvir!
þv kvnnir aldregi
deila m monnom mat;
oc þic i fletz strá
finna ne mattv,
þa er vago verar.»

Heimdallr qvaþ:

47 «Avlr ertv, Loci!
sva at þv ert orviti,
hvi ne lezcaþv, Loci?
þviat ofdryccia
veldr alda hveim,
er sina męlgi ne manaþ.»

Loci qvaþ:

48 «Þegi þv, Heimdallr!
þer var i árdaga
iþ lióta lif vm lagit;
ꜹrgo baci
þv mvnt ę vera
oc vaca vorþr goða.»

Scaþi qvaþ:

49 «Lętt er þer, Loci!
mvnattv lengi sva
leica lꜹsom hala;
þviat þic a hiorvi scolo
ins hrimcalda magar
gornom binda goð.»

Loci qvaþ:

50 «Veiztv, ef mic a hiorvi scolo
ens hmcalda magar
gornom binda goð:
fyrstr oc ǫfstr
var ec at fiorlagi,
þars ver a Þiaza þrifom.»

Scaþi qvaþ:

51 «Veiztv, ef fyrstr oc ǫfstr
vartv at fiorlagi,
þa er ér a Þiaza þrifvð:
fra minom veom
oc vꜹngom scolo
þer ę kꜹld ráþ coma.»

Loci qvaþ:

52 «Léttari í malom
vartv v Lꜹfeyiar son,
þa er þv letz mer a beð þinn boþit;
getiþ verþr oss slics,
ef ver gorva scolom
telia vommin vár.»

Þa gecc Sif fram oc byrladi Loca i hrimcalci mioþ oc męlti:

53 «Heill ver þv nv, Loci!
oc tac v hmcalci
fvllom forns miaðar!
heldr þv hana eina
latir m asa sonom
vammalꜹsom vera.»

Hann toc v horni oc dracc af:

54 «Eín þv vęrir,
ef þv sva vęrir,
vꜹr oc grꜹm at veri;
einn ec veít,
sva at ec uita þicciomc,
hór oc af Hlorriða,
oc var þat sa inn lęvisi Loci.»

Beyla qvaþ:

55 «Fioll ꜹll scialfa,
hygg ec a for vera
heiman Hlorriþa;
hann ręþr
þeim er rǫgir her
goð ꜹll oc gvma.»

Loci qvaþ:

56 «Þegi þv, Beyla!
þv ert Byggviss qvęn
oc meini blandin mioc;
okynian meira
coma m asa sonom,
ꜹll ertv, deigia! dritin.»

Þa com Þorr at oc qvaþ:

57 «Þegi þv, rꜹg vettr!
þer scal minn þrv́ðhamarr
Miollnir mal fyr nema;
herþaklett drep ec
þer halsi af,
oc verþr þa þino fiorvi vm farit.»

Loci qvaþ:

58 «Iarðar bvrr
er her nv inn kominn,
hvi þrasir þv sva, Þorr?
enn þa þorir þv ecci,
er þv scalt v vlfinn vega,
oc svelgr hann allan Sigfꜹðvr

Þorr qvaþ:

59 «Þegi þv, rꜹg vettr!
þer scal minn þrv́ðhamarr
Miollnir mal fyr nema;
vpp ec þer verp
oc a ꜹstrvega,
siþan þic mangi sér.»

Loci qvaþ:

60 «Avstrfǫrvm þinom
scaltv aldregi
segia seggiom fra,
sizt i hansca þvmlvngi
hnvcþir þv, ęinhęri!
oc þóttisca þv þa Þorr vera.»

Þorr qvaþ:

61 «Þegi þv, rꜹg vettr!
þer scal minn þrv́ðhamarr
Miollnir mal fyr nema;
hendi inni hǫgri
drep ec þic Hrvngnis bana,
sva at þer brotnar beina hvat.»

Loci qvaþ:

62 «Lifa ętla ec mer
langan aldr,
þottv hętir hamri mer;
scarpar alar
þottv þer Scrymiss vera,
oc mattira þv þa nesti na
oc svaltz þv þa hvngri heill.»

Þorr qvaþ:

63 «Þegi þv, rꜹg vettr!
þer scal minn þrv́ðhamarr
Miollnir mal fyr nema;
Hrvngnis bani
mun þer i hel coma
fyr nagrindr neþan

Loci qvaþ:

64 «Kvað ec fyr asom,
qvaþ ec fyr asa sonom
þaz mic hvatti hvgr;
enn fyr þer einom
mvn ec vt ganga,
þviat ec veit, at þv vegr.

65 Avl gorðir þv, Ęgir!
enn þv aldri mvnt
siþan svmbl vm gora;
eiga þín ꜹll,
er her inni er,
leici yfir logi,
oc brenni þer a baki!»

Enn eptir þetta falz Loci i Fránangrs forsi i lax liki, þar toco ęsir hann. Hann var bvndinn m þꜹrmom sonar sins † Nara; enn Narfi sonr hans varþ at vargi. Scaþi toc eitrorm oc festi vp yfir annlit Loca; drꜹp þar or eitr. Sigyn kona Loca sat þar oc helt mvnnlꜹg vndir eitriþ. Enn er mvnnlꜹgin var fvll, bar hon vt eitriþ. Enn meþan drꜹp eitriþ a Loca. Þa kiptiz hann sva hart v, at þan af scalf iorþ ꜹll: þat ero nv callaþir landscialptar.

Источник: Sophus Bugge: Sæmundar Edda (1867).

Текст с сайта Old Norse etexts

По всем вопросам пишите в раздел форума Valhalla: Эпоха викингов