Frá dauða Sinfjötla

Sigmvndr Vꜹlsvngsson var konvngr a Fraclandi; Sinfiotli var ellztr hans sona, annarr Helgi, þriþi Hamvndr. Borghildr, cona Sigmvndar, atti broþvr, er hét .   .   .   .   .   .   .   Enn Sinfiotli, stivpson hennar oc .   .   .   .   .   .   .   baþo einnar kono baþir, oc fyr þa sꜹc drap Sinfiotli hann. Enn er hann com heim, þa baþ Borghildr hann fara a brot; enn Sigmvndr bꜹþ henne fębǫtr, oc þat varþ hon at þiggia. Enn at erfino bar Borghildr ꜹl; hon toc eitr micit horn fvllt oc bar Sinfiotla; enn er hann sa i hornit, scilþi hann, at eitr var i, oc męlti til Sigmvndar: «Giorotr er dryccrinn, ai!» Sigmvndr toc hornit oc dracc af. Sva er sagt at Sigmvndr var harþgorr, at hvarki mátti hanom eitr granda vtan ne innan; enn allir synir hans stoþvzc eítr a hꜹrvnd vtan. Borghildr bar annat horn Sinfiotla oc baþ dręcca, oc for alt sem fyrr. Oc enn iþ þriþia sinn bar hon hanom hornit oc þo amęlissorþ m, ef hann drycci eigi af. Hann męlti enn sem fyrr v Sigmvnd. Hann sagði: «Lattv gron sia þá, sonr!» Sinfiotli dracc oc varþ þegar dꜹþr. Sigmvndr bar hann langar leidir i fangi ser oc kom at firþi einom miovom oc longom, oc var þar scip eitt litiþ oc maþr einn á; hann bꜹð Sigmvndi far of fiorþinn. Enn er Sigmvndr bar licit vt a scipit, þa var batrinn hlaþinn; karl męlti, at Sigmvndr scyldi fara fyr innan fiorþinn. Karl hratt vt scipino oc hvarf þegar. — Sigmvndr konvngr dvalþiz lengi i Danmorc i riki Borghildar, siþan er hann fecc hennar. For Sigmvndr þa svþr i Fraccland til þess riciss, er hann atti þar. Þa fecc hann Hiordisar dottvr Eylima konvngs; þeirra son var Sigvrþr. Sigmvndr konvngr fell i orrosto fyr Hvndings sonom; enn Hiordís giptiz þa Alfi syni Hialprecs konvngs. Ox Sigvrþr þar vp i barnęsco. Sigmvndr oc allir synir hans voro langt vmfram alla menn aþra vm afl oc voxt oc hvg oc alla atgervi. Sigvrþr var þo allra framarstr, oc hann calla allir menn i fornfrǫþom vm alla menn fram oc gꜹfgastan herkonvnga.

Источник: Sophus Bugge: Sæmundar Edda (1867).

Текст с сайта Old Norse etexts

По всем вопросам пишите в раздел форума Valhalla: Эпоха викингов