Þrymskviða
eða
Hamarsheimt

1 Reiðr var þa Vingþórr,
er hann vacnaþi
oc sins hamars
vm sacnaði;
scegg nam at hrista,
scꜹr nam at dyia,
reþ Iarþar bvrr
vm at þreifaz.

2 Oc hann þat orða
allz fyrst vm qvaþ:
«Heyrðv nv, Loci!
hvat ec nv męli,
er eigi veit
iarðar hvergi
ne vphimins:
áss er stolinn hamri».

3 Gengo þeir fagra
Freyio tvna,
oc hann þat orða
allz fyrst vm qvaþ:
«Mvntv mer, Freyia!
fiaþrhams liá,
ef ec minn hamar
męttac hitta?».

Freyia qvaþ:

4 «Þo mvnda ec gefa þer,
þott or gvlli vęri,
oc þo selia
at vęri or silfri

5 Flo þa Loci,
fiaðrhamr dvnþi,
vnz fyr vtan com
asa garða
oc fyr innan com
iotna heima.

6 Þrymr sat a hꜹgi,
þvrsa drottinn,
greyiom sinom
gvllbꜹnd snǫri
oc mꜹrom sinom
mꜹn iafnaði.

Þrymr qvaþ:

7 «Hvat er m asom?
hvat er m alfom?
hví ertv einn kominn
í iotvnheima?»
Loci qvaþ:
«Ilt er m asom,
ilt er meþ alfom;
hefir þv Hloriþa
hamar vm folginn

Þrymr qvaþ:

8 «Ec hefi Hlorriþa
hamar vm folginn
átta rꜹstom
fyr iorþ neþan;
hann engi maþr
aptr um heimtir,
nema fǫri mer
Freyio at qvęn.»

9 Fló þa Loci,
fiadrhamr dvnþi,
vnz fyr vtan com
iotna heima
oc fyr innan com
asa garða;
mętti hann Þór
miðra garða,
oc hann þat orda
allz fyrst vm qvad:

10 «Hefir þv erendi
sem erfiði?
segðv a lopti
long tiþindi:
opt sitianda
sꜹgvr vm fallaz,
oc liggiandi
lygi vm bellir.»

Loci qvaþ:

11 «Hefi ec erfidi
oc orindi;
Þrymr hefir þinn hamar,
þvrsa drottinn;
hann engi maþr
aptr vm heimtir,
nema hanom fǫri
Freyio at qván.»

12 Ganga þeir fagra
Freyio at hitta,
oc hann þat orda
allz fyrst vm qvað:
«Bittv þic, Fręyia!
brvþar líni,
viþ scolom aka tvꜹ
i iotvnheima.»

13 Reið varð þa Freyia
oc fnasaþi,
allr ása salr
vndir bifðiz,
stꜹcc þat iþ micla
men Brisinga:
«Mic veiztv verþa
vergiarnasta,
ef ec ek meþ þer
i iotvnheima.»

14 Senn varo ęsir
allir a þingi
oc asynior
allar a mali,
oc vm þat reþo
rikir tifar,
hve þeir Hloriþa
hamar vm sętti.

15 Þa qvaþ þat Heimdallr,
hvitastr ása,
— vissi hann vel fram
sem vanirrir —:
«Bindo ver Þor þa
brvþar lini,
hafi hann iþ micla
men Brisinga!

16 Latom vnd hanom
hrynia lvcla
oc kvennvaþir
vm kne falla,
en a briosti
breiþa steína
oc hagliga
vm hꜹf typpom

17 Þa qvaþ þat Þorr,
þrvðugr ass:
«Mic mvno ęsir
argan kalla,
ef ec bindaz lęt
brvþar líni.»

18 Þa qvaþ þat Loci,
Lꜹ́feyiar sonr:
«Þegi þv, Þorr!
þeirra orþa;
þegar mvno iotnar
asgarð bva,
nema þv þinn hamar
þer vm heimtir.»

19 Bvndo þeir Þór þa
brvþar líni
oc eno micla
meni Brisinga,
leto vnd hanom
hrynia lvcla
oc kvennvaþir
vm kne falla,
enn a briosti
breiþa steina,
oc hagliga
vm hꜹfvþ typþo.

20 Þa qvaþ Loci,
Lꜹfeyiar sonr:
«Mvn ec oc m þer
ambót vera,
vid scolom aka tvęr
i iotvnheima.»

21 Senn varo hafrar
heim vm reknir,
scyndir at scꜹclom,
scyldo vel renna;
biorg brotnoþo,
brann iorþ loga,
ók Oþins sonr
í iotvnheima.

22 Þa qvaþ þat Þrymr,
þvrsa drottinn:
«Standit vp, iotnar!
oc straiþ becci;
nv fǫriþ mer
Freyio at qvan,
Niarþar dottvr
or Noatvnom!

23 Ganga her at gardi
gvllhyrnþar kýr,
oxn alsvartir
iotni at gamni;
fiolþ a ec meiþma,
fiolþ a ec menia,
einnar mer Freýio
avant þiccir

24 Var þar at qveldi
vm comiþ snimma,
oc fyr iotna
ꜹl fram borit;
einn át oxa,
átta laxa,
krasir allar
þęr er konor scyldo,
dracc Sifiar verr
sáld þriv miaþar.

25 Þa qvaþ þat Þrymr,
þvrsa drottinn:
«Hvar sattv brvþir
bíta hvassara?
saca ec brvþir
bíta breiðara,
ne inn meira mioþ
mey vm drecca.»

26 Sat in alsnotra
ambót fyr,
er orð vm fann
v iotvns máli:
«Át vętr Freyia
átta nottom,
sva var hon oþfv́s
í iotvnheima.»

27 Lꜹ́t vnd líno,
lysti at cyssa,
enn hann vtan stꜹcc
endlangan sal:
«Hvi ero ꜹndótt
ꜹgo Freyio?
þicci mer or ꜹgvm
[eldr of] brenna.»

28 Sat in alsnotra
ambót fyr,
er orð vm fann
viþ iotvns máli:
«Svaf vętr Freyia
átta nottom,
sva var hon oþfv́s
i iotvnheima.»

29 Inn com in arma
iotna systir,
hin er brv́þfiár
biþia þorði:
«Lattv þer af hꜹndom
hringa rꜹ́ða,
ef þv ꜹþlaz vill
astir minar,
astir minar,
alla hylli!»

30 Þa qvaþ þat Þrymr,
þvrsa drottinn:
«Beriþ inn hamar
brv́þi at vígia,
leggit Miollni
i meyiar kne,
vígit ocr saman
Várar hendi!»

31 Hló Hlorriþa
hvgr i briosti,
er harðhvgaþr
hamar vm þecþi;
Þrym drap hann fyrstan,
þvrsa drottin,
oc ętt iotvns
alla lamþi.

32 Drap hann ina ꜹldno
iotna systvr,
hin er brvþfiár
of beþit hafði;
hon skell vm hlꜹ́t
fyr scillinga,
enn hꜹgg hamars
fyr hringa fiolþ.
Sva com Oþins sonr
endr at hamri.

Источник: Sophus Bugge: Sæmundar Edda (1867).

Текст с сайта Old Norse etexts

По всем вопросам пишите в раздел форума Valhalla: Эпоха викингов