Ævi Snorra goða

Snorri goði átti nítján börn frjálsborin, þau er ór barnæsku kómust. Þórðr kausi var ellstr, annarr Þóroddr, þriði Þorsteinn, fjórði Guðlaugr munkr. Þeir váru synir Ásdísar Víga-Styrsdóttur. Fimmta var Sigríðr, sétta Unnr. Þær váru dætr Þuríðar, dóttur Illuga ins rauða. Sjaundi Kleppr, áttunda Halldóra, níunda Þórdís, tíunda Guðrún, ellefti Halldórr, tólfti Máni, þrettándi Eyjólfr, fjórtánda Þóra, fimmtánda Hallbera, sextánda Þuríðr, sjautjándi Þorleifr, átjánda Álöf, nítjándi Snorri. Hann var fæddr eftir föður sinn. Þessi váru börn Hallfríðar Einarsdóttur. Snorri goði átti þrjú börn þýborin, sá hét annarr Þórðr kausi, Jörundr ok Þórhildr.

Snorri goði var fjórtán vetra, er hann fór útan. Hann var útan einn vetr. Inn næsta vetr, er hann kom út, var hann at Helgafelli með Berki inum digra, föðurbróður sínum, ok Þórdísi, móður sinni. Þetta haust drap Eyjólfr inn grái, sonr Þórðar gellis, Gísla Súrsson, ok þetta vár eftir, er Snorri var sextán vetra gamall, gerði hann bú at Helgafelli ok bjó þar tuttugu ok þrjá vetr, áðr kristni var í lög tekin á Íslandi, en þaðan frá bjó hann átta vetr at Helgafelli. Ok á þeim síðasta vetri drap Þorgestr Þórhallsson Víga-Styr, mág Snorra goða, á Jörva í Flisuhverfi. Síðan fór hann búi sínu í Sælingsdalstungu ok bjó þar tuttugu vetr. Hann lét kirkju gera at Helgafelli, en aðra í Tungu í Sælingsdal. En sumir segja, at hann léti gera í annat sinn at Helgafelli með Guðrúnu kirkju, þá er sú brann, er hann hafði gera látit.

Hann andaðist ór sótt á inum sjaunda vetri ins sjaunda tigar aldrs síns. Þat var einum vetri eftir fall Óláfs konungs ins helga, ok var Snorri goði grafinn heima þar í Sælingsdalstungu at þeiri kirkju, er hann sjálfr hafði gera látit. Hann er orðinn stórum kynsæll, því at til hans telja ættir flestir inir göfgustu menn á Íslandi ok Bjarkeyingar á Hálogalandi, Götuskeggjar í Færeyjum ok margt annat stórmenni, þat er hér eigi er talt, bæði á þessu landi ok öðrum. Þa …

Источник: Íslendinga sögur. Guðni Jónsson bjó til prentunar.

Текст с сайта Heimskringla

По всем вопросам пишите в раздел форума Valhalla: Эпоха викингов