Síra Eiríkur og biskup Jón Vídalín

Herra Jón biskup Þorkelsson kom eitt sinn til fundar við síra Eirík og ætlaði að vera við embætti hjá honum. Þeir fóru nú til kirkjunnar.

En er þeir voru lítt á leið komnir þurfti Eiríkur að leysa brækur, en biskup beið hans á meðan. Þetta gekk aftur og aftur þar til biskupi leiddist og fór á undan presti. En er hann kom að kirkjudyrum þá kom síra Eiríkur ofan úr stólnum.

Þá segir biskup: „Bölvað óhræsi ertu, síra Eiríkur!“

Oft og mörgum sinnum beiddi biskup Vídalín Eirík að sýna sér kölska því hann heyrði sagt hann gæti það; sagði sér væri fýsn á að sjá hann, því hann sagðist hafa sagt svo mikið af honum sjálfur.

Síra Eiríkur færðist undan. En fyri þrábeiðni biskups þá lofar hann því. Þeir sátu í stofu og sat biskup öðrumegin við borðið, en prestur öðrumegin. Að stundu liðinni rifnar gólfið og sýnist biskupi þar koma upp þvílíkt ferlíki að hann fellur í öngvit fram á borðið, en prestur sló saltaranum í hausinn á því.

Sagði biskup svo síðan að hann hefði ekki of mikið af honum sagt.

По всем вопросам пишите в раздел форума Valhalla: Эпоха викингов