Hýmiskviða

1 Ar valtívar
veiþar námo
oc svmblsamir,
aþr saþir yrþi,
hristo teina
oc a hlꜹt sa,
fvndo þeir at Ęgis
ꜹrcost hvera.

2 Sat bergbvi
barnteitr fyr
mioc glicr megi
miscorblinda;
leit i ꜹgo
Yggs barn í þrá:
«Þv scalt asom
opt svmbl gora.»

3 Avnn fecc iotni
orþbǫginn halr,
hvgdi at hefnþom
hann nęst viþ goð;
bað hann Sifiar ver
ser fǫra hver:
«þannz ec ꜹllom ol
yðr of heita.»

4 Ne þat matto
męrir tifar
oc ginnregin
of geta hvergi,
vnnz af trygðom
Tyr Hlorriþa
astraþ mikit
einom sagdi:

5 «Byr fyr ꜹstan
Ęlivága
hvndviss Hymir
at himins enda;
a minn faþir
moþvgr ketil,
rvmbrvgðinn hver,
rastar divpan.»

Þorr qvaþ:

6 «Veiztv ef þiggiom
þann lꜹgvelli?»
Tyr qvaþ:
«Ef, vinr! velar
viþ gorvom til.»

7 Fóro drivgom
dag þann fram
Asgardi fra,
vnz til Egils qvomo;
hirði hann hafra
horngꜹfgasta,
hvrfo at hꜹllo,
er Hymir átti.

8 Mꜹgr fann ꜹmmo
mioc leiþa ser,
hafði hꜹfda
hvndrvð nío;
enn ꜹnnvr gecc
algvllin fram
brv́nhvít bera
biorveig syni:

9 «Átniþr iotna!
ec viliac ycr
hvgfvlla tvá
vnd hvera setia;
er mínn frí
mꜹrgo sinni
glꜹggr viþ gesti,
geyrr illz hvgar.»

10 En vascapadr
varþ siþbvinn
harðráþr Hymir
heim af veiþom;
gecc inn i sal,
glvmþo ioclar,
var karls, er com,
kinnscogr frǫrinn.

Frilla qvaþ:

11 «Verþv heill, Hymir!
i hvgom goþom,
nv er sonr kominn
til sala þinna,
sa er viþ vęttom
af vegi longom;
fylgir hánom
hroþrs-andscoti,
vinr verliða,
Vęorr heitir sa.

12 Sé þv, hvar sitia
vnd salar gafli!
sva forþa ser,
stendr sv́l fyr.»
Svndr stꜹcc svla
fyr sión iotvns,
enn aþr i tvꜹ
áss brotnaþi.

13 Stvcco atta,
en einn af þeim
hverr harðsleginn
heill, af þolli;
fram gengo þeir,
enn forn iotvnn
sionom leiddi
sinn andscota.

14 Sagðit hanom
hvgr vel þa,
er hann sa gygiar grǫti
a golf kominn;
þar varo þiorar
þrír of teknir,
bað senn iotvnn
sioþa ganga.

15 Hvern leto þeir
hꜹfdi scemra
oc a sæyþi
siþan báro;
át Sifiar verr,
aþr sofa gengi,
einn meþ ꜹllo
eyxn tva Hymis.

16 Þótti három
Hrvngnis spialla
verþr Hlórriða
vel fvllmicill:
«Mvnom at apni
ꜹþrom verþa
viþ veiðimat
ver þrír lifa.»

17 Veorr qvaz vilia
a vág róa,
ef ballr iotvnn
beítor gęfi.
Hymir qvaþ:
«Hverf þv til hiarþar,
ef þv hvg trvir,
briotr bergdana!
beitor sǫkia.

18 Þess vęnti ec,
at þer mynit
ꜹgn af oxa
ꜹþfeng vera.»
Sveinn sysliga
sveif til scógar,
þar er vxi stoþ
alsvartr fyr.

19 Brꜹt af þióri
þvrs ráþbani
hatv́n ofan
horna tveggia.
Hymir qvaþ:
«Verc þiccia þin
verri myclo,
kiola valdi!
enn þv kyrr sitir.»

20 Bað hlvnngota
hafra drottinn
átrvnn apa
vtarr fǫra;
enn sa iotvnn
sina talþi
litla fysi
at róa lengra.

21 Dró meirr Hymir
moþvgr hvali
einn a ꜹngli
vpp senn tvá;
enn aptr i scvt
Oþni sifiaþr
Veorr við velar
vað gorði ser.

22 Egndi a ꜹngvl
sa er ꜹldom bergr
orms einbani
vxa hǫfdi;
geín við agni
sv er god fiá
vmgiorþ nedan
allra landa.

23 Dró diarfliga
daþraccr Þorr
orm eitrfán
vpp at borði;
hamri kniþi
hafiall scarar
ofliótt ofan
vlfs hnitbroþvr.

24 Hreingalcn hlvmþo,
en hꜹlcn þvto,
for in forna
fold ꜹll saman,
sꜹcþiz siþan
sa fiscr i mar.

25 Oteitr iotvnn,
er þeir aptr réro,
sva at ár Hymir
ecci męlti,
veifþi hann rǫþi
veðrs annars til.

Hymir qvaþ:

26 «Mvndo vm vinna
verc halft viþ mic,
at þv heim hvali
haf til bǫiar,
eþa flotbrvsa
festir occarn?»

27 Gecc Hlorriþi,
greip a stafni,
vatt meþ ꜹstri
vpp lꜹgfáki;
einn meþ árom
oc meþ ꜹstscoto
bar hann til bǫiar
brimsvín iotvns,
oc holtriþa
hver i gegnom.

28 Oc enn iotvnn
vm afrendi
þragirni vanr
viþ Þór senti;
qvaþat mann ramman,
þott róa kynni
krꜹptvrligan,
nema kálc bryti.

29 Enn Hlorriþi,
er at hꜹndom com,
brátt lét bresta
brattstein i tvꜹ;
slo hann sitiandi
svlor igognom,
baro þo heilan
fyr Hymi siþan.

30 Vnz þat in fríþa
frilla kendi
ástráþ mikit,
eitt er vissi:
«Drep viþ hꜹ́s Hymiss!
hann er harðari
costmoþs iotvns
kalci hveriom.»

31 Harþr reís a kné
hafra drottinn,
fǫrþiz allra
i asmegin;
heill var karli
hialmstofn ofan,
enn vínferill
valr rifnaþæ.

32 «Morg veit ec męti
mer gengin fra,
er ec kalci se
yr kniam hrvndit;»
karl ord vm qvað:
«knacat ec segia
aptr ęvagi,
þv ert, ꜹlþr! of hęitt.

33 Þat er til costar,
ef coma męttiþ
v́t or óro
ǫlkiól hofi.»
Tyr leitaþi
tysvar hrǫra,
stoþ at hváro
hverr kyrr fyr.

34 Fadir Móþa
fecc a þremi
oc igegnom steig
golf niþr i sal;
hóf ser a hꜹfvþ vp
hver Sifiar verr,
enn a hęlom
hringar scvllo.

35 Foro lengi,
aðr líta nam
aptr Oþins sonr
eino sinni;
sa hann or hreysom
meþ Hymi ꜹstan
folcdrott fara
fiolhꜹfdaþa.

36 Hóf hann ser af herðom
hver standanda,
veifði hann Miollni
morðgiornom fram,
oc hrꜹ́nhvali
hann alla drap.

37 Foroð lengi,
aþr liggia nam
hafr Hlorriða
halfdꜹþr fyr;
var scirr scꜹkvls
scaccr a banni,
enn þvi inn lęvisi
Loci vm olli.

38 Enn er heyrt hafið,
— hverr kann vm þat
godmalvgra
gorr at scilia? —
hver af hrꜹ́nbv́a
hann lꜹ́n vm fecc,
er hann bęþi galt
born sin fyr.

39 Þrottꜹflvgr kom
a þing goda
oc hafdi hver,
þannz Hymir atti;
enn vear hverian
vel scolo drecca
ꜹlþr at Ęgis
eitt hꜹrmeitiþ.