Landnámabók

Formáli

Í aldarfarsbók þeiri, er Beda prestr heilagr gerði, er getit eylands þess, er Týli heitir ok á bókum er sagt, at liggi sex dægra sigling í norðr frá Bretlandi. Þar sagði hann eigi koma dag á vetr ok eigi nótt á sumar, þá er dagr er sem lengstr. Til þess ætla vitrir menn þat haft, at Ísland sé Týli kallat, at þat er víða á landinu, er sól skínn um nætr, þá er dagr er sem lengstr, en þat er víða um daga, er sól sér eigi, þá er nótt er sem lengst. En Beda prestr andaðist sjau hundruð þrjátigi ok fimm árum eftir holdgan dróttins várs, at því er ritat er, ok meir en hundraði ára fyrr en Ísland byggðist af Norðmönnum.

En áðr Ísland byggðist af Nóregi, váru þar þeir menn, er Norðmenn kalla Papa. Þeir váru menn kristnir, ok hyggja menn, at þeir hafi verit vestan um haf, því at fundust eftir þeim bækr írskar, bjöllur ok baglar ok enn fleiri hlutir, þeir er þat mátti skilja, at þeir váru Vestmenn. [Þat fannst í Papey austr ok í Papýli.] Enn er ok þess getit á bókum enskum, at í þann tíma var farit milli landanna.