Ættartölur

1. Oddaverjar.

Sæmundr inn fróði átti Guðrúnu, dóttur Kolbeins Flosasonar. Þeira börn váru þau Eyjólfr prestr ok Loftr prestr ok Loðmundr ok Þórey, er átti Þorvarðr Óláfsson. Þeira sonr var Óláfr prestr.

Loftr Sæmundarson fór utan ok fekk í Nóregi Þóru, — en þat reyndist síðan, at hon var dóttir Magnúss konungs berfætts. Jón var sonr þeira, er mestr höfðingi ok vinsælastr hefir verit á Íslandi. Hann átti Halldóru, dóttur Skegg-Brands. Þeira börn váru þau Sæmundr ok Solveig, er átti Guðmundr gríss. Synir Ragnheiðar ok Jóns váru þeir Páll byskup ok Ormr Breiðbælingr. Ragnheiðr var Þórhallsdóttir, systir Þorláks byskups ins helga. Sonr Jóns Loftssonar ok Æsu Þorgeirsdóttur var Þorsteinn. Hans synir váru þeir Andrés ok Ámundi, Þorgeirr ok Gunnarr. Enn var sonr Jóns Loftssonar ok Helgu Þórisdóttur Einarr. Hann átti mörg börn: Svartr, Hrafn, Kriströðr. Enn váru synir Jóns Loftssonar ok Valgerðar Loftsdóttur Hallbjörn prestr ok Sigurðr, er átti Salgerði Erlendsdóttur.

Loðmundr Sæmundarson átti Þórunni, dóttur Þórarins Fornasonar, — þeira sonr Jón, er átti Aldísi Halldórsdóttur, — þeira börn Valgerðr ok Eyjólfr. Sonr Eyjólfs ok Valgerðar Gamladóttur var Guðlaugr. Enn váru börn Eyjólfs ok Hildar Skeggjadóttur, Skútusonar: Jón, Loðmundr, Álfheiðr.

Ragnhildr var dóttir Valgerðar ok Sæmundar Jónssonar ok Solveig.

2. Sturlungar.

Þórðr, sonr Gils Snorrasonar, Jörundarsonar, var samtíða við Gizur byskup. Móðir Gils var Ásný, dóttir Sturlu Þjóðrekssonar. Móðir Þórðar var Þórdís Guðlaugsdóttir. Móðir Þórdísar var Þorkatla, dóttir Halldórs Snorrasonar goða. Þórðr Gilsson átti Vigdísi Svertingsdóttur, Grímssonar. Móðir Vigdísar var Þórdís, dóttir Guðmundar Guðmundarsonar, Eyjólfssonar ins halta, Guðmundarsonar ins ríka. Sturla hét sonr þeira Þórðar ok Vigdísar, en annarr Snorri, Þórdís ok Guðrún dætr.

Sturlu fylgdi fyrst Álof Vilhjálmsdóttir, — þeira börn Sveinn ok Þuríðr, Helga ok Valgerðr, Sigríðr.

Síðan fekk hann Ingibjargar, dóttur Þorgeirs Hallasonar. Steinunn hét dóttir þeira, er átti Jón Brandsson, — þeira synir Bergþórr ok Ívarr, Brandr, Ingimundr. Þórdís hét dóttir þeira Sturlu ok Ingibjargar. Hana átti Bárðr, sonr Snorra Bárðarsonar ins svarta. Pétr hét sonr þeira, Sturla ok Snorri.

Björn hét sonr þeira Sturlu ok Guðfinnu.

Sturla átti síðar Guðnýju, dóttur Böðvars Þórðarsonar. Móðir Böðvars var Valgerðr, dóttir Markúss lögsögumanns. Móðir Guðnýjar var Helga, dóttir Þórðar Magnússonar ór Reykjaholti. Börn þeira Sturlu ok Guðnýjar váru þau Þórðr ok Sighvatr, Snorri ok Helga, er átti Sölmundr Austmaðr, ok Vigdís, er Gellir Þorsteinsson átti.

Þórðr Sturluson átti fyrst Helgu, dóttur Ara ins sterka, ok áttu þau ekki barn. Síðan átti hann Guðrúnu, dóttur Bjarna Bjarnasonar. Böðvarr var sonr þeira, en Halla dóttir, er átti Tómas prestr Þórarinsson. Þórðr átti frillu, er Þóra hét, — þeira börn Óláfr, Sturla, Guttormr, Þórðr, Valgerðr, Guðrún.

Sighvatr Sturluson átti Halldóru Tumadóttur, — þeira börn Tumi, Sturla, Kolbeinn, Þórðr kakali, Markús, Þórðr krókr, Tumi, Steinvör, er átti Hálfdan Sæmundarson. Valgerðr hét dóttir Sighvats, er átti Bárðr Þorkelsson. Sigríðr hét enn dóttir Sighvats ok Helgu Bjarnadóttur. Hana átti Styrmir Þórisson.

Snorri Sturluson átti Herdísi Bersadóttur, — þeira börn Jón murti ok Hallbera, er Kolbeinn Arnórsson átti. Síðar átti Snorri Hallveigu, dóttur Orms Jónssonar. Ekki lifði barna þeira. Snorri átti son, er Órækja hét. Þuríðr Hallsdóttir var hans móðir. Ingibjörg var dóttir Snorra ok Guðrúnar Hreinsdóttur. Ingibjörg var gift Gizuri Þorvaldssyni. Þórdís var dóttir Snorra, er Þorvaldr átti Vatnsfirðingr. Oddný hét hennar móðir.

3. Ásbirningar.

Ásbjörn Arnórsson átti Ingunni, dóttur Þorsteins Snorrasonar goða. Börn þeira váru þau Arnórr, Þorsteinn ok Böðvarr, Sigríðr.

Arnórr átti Guðrúnu, dóttur Daða Starkaðarsonar. Þeira sonr var Kolbeinn, — hans sonr Tumi, ok var hann eigi skilgetinn.

Tumi átti fyrr Guðrúnu, dóttur Þóris Steinmóðarsonar. Sigríðr hét dóttir þeira, er átti Sigurð Ormsson. Síðar átti Tumi Þuríði Gizurardóttur. Þeira börn váru þau Kolbeinn ok Arnórr ok Halldóra, er átti Sighvatr Sturluson, ok Álfheiðr, er átti Ingimundr Grímsson. Þorsteinn hét sonr Tuma laungetinn. Hann var faðir Ívars munks ok Tuma ok Guðrúnar, er fylgdi Sveinbirni Hrafnssyni, ok Steinunnar, er Kráki fylgdi, ok Sigríðar. Arndís hét dóttir Tuma laungetin, er átti Steingrímr Þorvaldsson. Arnórr Tumason átti Ásdísi Sigmundardóttur, — þeira börn Kolbeinn ungi ok Sigríðr, er átti Böðvarr at Stað, ok Herdís, er átti Böðvarr í Bæ, ok Arnbjörg, er Órækja átti Snorrason. Dóttir Arnórs laungetin var Þjóðbjörg, er Broddi átti.

Kolbeinn, sonr Arnórs Ásbjarnarsonar, átti Herdísi, dóttur Þorkels Steinólfssonar. Þeira sonr var Arnórr, er átti Guðrúnu, dóttur Brands byskups, — þeira sonr Kolbeinn kaldaljós ok Halldóra, er átti Jón Sigmundarson. Þeira sonr var Brandr byskup inn síðari. Kolbeinn kaldaljós átti Margrétu, dóttur Sæmundar Jónssonar, — þeira börn Brandr, Páll, Valgerðr.

4. Svínfellingar.

Sigmundr Þorgilsson átti Halldóru, dóttur Skeggja Bjarnasonar. Þeira sonr var Jón. Hann átti Þórnýju, dóttur Gils Einarssonar. Þeira son var Ormr, er átti Helgu, dóttur Árna Grímssonar.

Þeira sonr var Sigmundr, er átti Arnbjörgu, dóttur Odds Gizurarsonar, — þeira sonr Jón, er fyrr átti Þóru, dóttur Guðmundar gríss, — þeira börn Ormr Svínfellingr ok Steinunn ok Solveig. Jón átti síðar Halldóru Arnórsdóttur. Þeira sonr var Brandr byskup. Sonr Jóns laungetinn var Þórarinn, er átti Helgu, dóttur Digr-Helga. Þeira synir váru þeir Þorvarðr ok Oddr.

Sigurðr munkr var enn sonr Orms, bróðir Sigmundar. Hann átti Þuríði Gizurardóttur síðar, en fyrr Sigríði Tumadóttur.

Ormr Svínfellingr átti Álfheiði Njálsdóttur, — þeira börn Sæmundr ok Guðmundr, Ormr ok Þóra, er Krákr átti Tómasson. Oddný var laungetin dóttir Orms, er Finnbjörn átti.

Móðir Skarð-Snorra hét Guðrún, — hennar móðir Halldóra, dóttir Jóns Sigmundarsonar, Þorgilssonar, Þorgeirssonar, Þórðarsonar Freysgoða.

5. Seldælir.

Bárðr inn svarti hét göfugr bóndi, er bjó í Selárdal. Hann var Atlason. Bárðr átti Birnu, dóttur Arons Snorrasonar, — þeira börn Sveinbjörn, Atli, Aron, Snorri, Ingólfr, Styrbjörn, Gunnarr, Höskuldr, Rögnvaldr, Markús, Hallbera, Oddgerðr, Salgerðr, Úlfrún.

Sveinbjörn átti Steinunni, dóttur Þórðar Oddleifssonar. Hrafn var sonr þeira, er átti Hallkötlu Einarsdóttur, — Sveinbjörn ok Krákr, Einarr ok Grímr, Steinunn, Herdís, Þórey, Þuríðr, Hallgerðr váru börn þeira. — Markús prestr inn sterki var sonr Sveinbjarnar. En dætr hans váru þær Herdís, er Hallr Gizurarson átti, ok Helga, er Brandr átti, ok Guðrún, er Sámr Símonarson átti, ok Birna ok Halla.

Aron Bárðarson átti Sigríði Þorleiksdóttur, systur Þorleifs beiskalda ór Hítardal, — þeira börn Hafþórr, Yngveldr, Ragnheiðr, er Ámundi átti; — þeira börn Þórðr, Tófa, Margrét, Hallbera, Birna. Ragnheiði átti síðar Þórarinn Þorkelsson, — þeira börn Krákr, Halldórr, Eyvindr, Tómas, er átti Höllu, dóttur Þórðar Sturlusonar; — þeira börn Krákr, Þórarinn, Auðunn, Snörtr, Guðrún, Ragnheiðr, Guðfinna, Guðríðr, Hallbera. — Guðfinna var dóttir Þórarins, er Skúli átti undir Hrauni. Snorri Bárðarson átti Sesilíu Ásgeirsdóttur. Þeira sonr var Bárðr, er átti Þórdísi Sturludóttur. Snorri átti síðar Sesilíu Hafþórsdóttur. Þeira dætr váru þær Þórlaug ok Úrsúla, er átti Sveinn Sturluson. Þessi váru laungetin börn Snorra Bárðarsonar: Eilífr ok Tófa, — hon var móðir Sæunnar, er Skarð-Snorri átti.

6. Vatnsfirðingar.

Þórðr í Vatnsfirði var sonr Þorvalds Kjartanssonar ok Þórdísar Hermundardóttur. Móðir Þorvalds var Guðrún, dóttir Halldórs Snorrasonar goða. Þórðr átti Sigríði, dóttur Hafliða Mássonar. Páll var sonr þeira ok Snorri, Teitr ok Ívarr.

Páll átti Guðrúnu, dóttur Brands byskups. Þessi váru börn Páls ok Hallveigar Ásmundardóttur: Vigfúss ok Oddný, — hennar börn ok Kálfs Snorrasonar á Mel: Vigfúss ok Snorri, Eirný, er fylgdi Þórði Jörundarsyni á Hítarnesi. Þessi váru börn Oddnýjar ok Þorbjarnar Bergssonar: Snorri, Teitr, Valgerðr, Margrét, er Ásgrímr átti Bergþórsson.

Snorri var faðir Hafliða, er týndist með Ásmundi kastanrassa. Snorri Þórðarson var ok faðir Þórðar ok Þorvalds ok Bárðar. Móðir Þorvalds var Jóreiðr Oddleifsdóttir, Þórðarsonar, Þorvaldssonar, Þórðarsonar, Þorkelssonar ins auðga ór Alviðru. Þorvaldr átti Kolfinnu, dóttur Einars Þorgilssonar, — þeira börn Einarr, er drukknaði á Ísafirði, ok Jóreiðr, er Hafþórr Halldórsson átti, ok Halldóra, er Eyjólfr Eyjólfsson átti. Þórðr var sonr Þorvalds ok Helgu Ormsdóttur. Snorri hét enn sonr Þorvalds. Illugi var sonr Þorvalds ok Þórdísar Ásgeirsdóttur. Ketill var sonr Þorvalds ok Lofnheiðar. Páll var sonr Þorvalds ok Halldóru, dóttur Sveins Helgasonar. Þorvaldr átti síðan Þórdísi, dóttur Snorra Sturlusonar, — þeira börn: Einarr ok Kolfinna.

7. Grundarmenn.

Þorsteinn, er ranglátr var kallaðr, bjó á Grund í Eyjafirði. Hann var Einarsson, Ketilssonar, Þorvaldssonar króks, Þórissonar af Espihóli, Hámundarsonar heljarskinns. Móðir Þorsteins var Steinunn Bergsdóttir, Vigfússonar, Víga-Glúmssonar. Þessi váru börn Þorsteins ok Steinunnar, dóttur Bjarnar Karlsefnissonar: Ketill, — hann átti Álfheiði Þorleifsdóttur beiskalda, Þorleikssonar ins auðga ór Hítardal, — þessi eru börn þeira: Þorleikr, Árni, Herdís, — þessi laungetin: Jón, Þórdís. Börn Þorleiks Ketilssonar ok Guðlaugar Eyjólfsdóttur, Guðmundarsonar gassimanns, Þorsteinssonar, Eyjólfssonar ins halta: Ketill prestr lögsögumaðr, Steinunn, Ingunn, — þessar eru laungetnar: Þóra ok Þorbjörg.

Björn var sonr Þorsteins rangláts, Óláfr og Einarr, Guðrún ok Steinunn, Helga.

Börn Óláfs Þorsteinssonar: Einarr, Guðrún, — börn Guðrúnar ok Eyjólfs Hallssonar: Jón í Möðrufelli.

Björn Þorsteinsson átti Ingibjörgu, dóttur Þorleifs beiskalda. Þeira sonr var Sæbjörn.

Dætr Guðrúnar Þorsteinsdóttur ok Jörundar Gunnarssonar: Halla, Kolfinna, Hallfríðr, Hallótta. Börn Höllu: Flosi, Einarr, Guðrún, Helga, Guðrún. Börn Kolfinnu: Jón, Kárr. Börn Jóns: Þorsteinn í Hvammi, Guðrún, Einarr. Börn Hallóttu: Styrmir, Steinunn, Þuríðr.

Börn Steinunnar Þorsteinsdóttur: Vilmundr, Þorsteinn, Hafliði.

Börn Helgu Þorsteinsdóttur ok Ásgríms Þórðarsonar: Hafliði, Þuríðr, Halldóra.

Móðir Ketils prests Þorleikssonar var Guðlaug Eyjólfsdóttir, Guðmundarsonar gassimanns, Þorsteinssonar, Eyjólfssonar halta, Guðmundarsonar ins ríka, Eyjólfssonar, Einarssonar, Auðunarsonar rotins. Móðir Eyjólfs Einarssonar var Valgerðr. Hennar móðir var Vilborg Ósvaldsdóttir, hennar móðir Úlfrún, Játmundardóttir Englakonungs. Móðir Guðlaugar var Sigríðr Hallsdóttir, Hrafnssonar lög[sögu]manns, Úlfheðinssonar lög[sögu]manns, Gunnarssonar lög[sögu]manns. En móðir Sigríðar var Valgerður Þorsteinsdóttir, Ásbjarnarsonar, Arnórssonar, Arngeirssonar, Spak-Böðvarssonar, Öndóttssonar kráku.

Источник: Sturlunga saga. Guðni Jónsson bjó til prentunar.

Текст с сайта Heimskringla